Дневник / 15.01.2003
уште еден успешен настап НА НАШАТА НАЈГОЛЕМА ПОП-ЅВЕЗДА
На 16 февруари Проески повторно ќе гостува во градот на Темза заедно со позната југословенска ѕвезда Жељко Јоксимовиќ Околу илјада посетители го проследија концертот на поп-ѕвездата Тоше Проески што се одржа на 8 јануари во дискотеката "Еквинокс" во Лондон. Еден ден претходно во оваа позната лондонска дискотека, која собира 3.000 посетители, прес-конференција по повод најновиот филм, одржал познатиот актер Леонардо ди Каприо. На двоиполчасовниот концерт на Тоше присуствувале претежно Македонци од повеќе возрасти што живеат и работат во Лондон. Гости на овој концерт биле Есма Реџепова, која пред тамошната публика се претставила со четири песни, и белградската група Д&Д. Девојките од овој бенд, ќерки на познатите браќа Кариќ, сопственици на белградската "БК телевизија", отпеале две композиции. Публиката одлично реагирала на изведбата и на нумерите на Тоше и го вратила на бис. - За мене е голем успех фактот што одржав солистички концерт во една таква позната дискотека. Се направи одлична атмосфера и дружењето со публиката таа ноќ беше на завидно ниво - изјави Тоше по враќањето во Скопје. По барање на публиката на бис се појавила и кралицата на ромската песна, Есма, која исто така оставила одличен впечаток. Проески повторно ќе гостува во Лондон, заедно со позната југословенска ѕвезда Жељко Јоксимовиќ, а нивниот концерт ќе се одржи на 16 февруари. Претходно, на 14-ти и 15 февруари, Тоше ќе настапи во Цирих, Швајцарија. (С.А.Н.)