Време / 08.05.2004
„ЕВРОСОНГ“ 2004 Ѓорге Стојанов
Тоше Проески добил понуди од фински, дански и од јужноафрикански дискографски куќи да ја сними евровизиската песна „Лифе“ за тамошните пазари. Според менаџерката на нашиот евровизиски претставник, Љиљана Петровиќ, слично интересирање покажале и компании од уште неколку земји, но засега најконкретни биле куќите од спомнативе земји. - Не контактираа дискографски куќи од повеќе земји кои покажаа интересирање да ја објават песната на Тоше на тамошните музички пазари, а тоа за нас е реален индикатор дека спаѓаме во редот на фаворитите во евровизиското полуфинале - ни изјави Петровиќ. Таа вчера се јави во Редакцијата на „Време“ за да реагира на текстот објавен во вчерашниот број на нашиот весник, во кој беше пласирана информација за откажувањето на планираната Македонска вечер во Истанбул. - Одржувањето на Македонската вечер не е нешто што мора да се случи. А не знам ни како може да се очекува такво нешто од нас, кога македонската држава со никакви средства не учествуваше во промоцијата на државата и на нашиот настап во Истанбул. Апелирам до новинарите да не избрзуваат со какви било коментари, а јас ве убедувам дека кога македонската делегација ќе се врати од Турција, транспарентно ќе ви одговорам на сите шпекулации што во меѓувреме се појавија во медиумите. Љиљана Петровиќ ни ја потврди информацијата што ја добивме од шефот на македонската делегација во Истанбул, Иван Мирчевски, дека на 10 мај, со почеток во 22 часот, Тоше Проески ќе гостува во специјалната емисија на приватната турска телевизија Канал Д, како специјален гостин на израелската делегација која откупила програмски простор од два часа. - Ќе бидат присутни претставници на повеќе земји-учеснички, но единствено Тоше од сите учесници ќе има статус на гостин. Тој заедно со придружните вокали и со комплетната кореографија ќе ја изведе во живо „Лифе“, песната со која ќе не претставува на „Евровизија 2004“. Мислам дека тоа е прекрасен начин за поголема промоција на нашиот Тоше.