Дневник / 01.03.2003
МАНИФЕСТАЦИЈА "ДВАНАЕСЕТ ВЕЛИЧЕСТВЕНИ"
Наградата за трајни вредности му припадна на Драган Ѓаконовски-Шпато Поп-ѕвездата Тоше Проески ги освои наградите за пејач, концерт и за најпопуларен изведувач по избор на публиката, а на Владо Јаневски му припаднаа наградите за најдобар текстописец, албум ("Има нешто посилно од се") и за хит на годината ("Некогаш и негде") на манифестацијата "Дванаесет величествени", која се одржа завчера во Универзалната сала. За пејачка на годината беше прогласена Биба Додева, а за група "Нонстоп". Мартин Вучиќ беше прогласен за откритие на годината, а наградите за најдобар аранжер и композитор ги зеде Владимир Дојчиновски-Дојчин. На Дарко Димитров му припадна статуетката за најдобар продуцент. Спотот што го изработи "Томато-продукција" за песната "Магија", на дуетот Тоше Проески и Есма Реџепова, победи во номинацијата за видеоизданијата. Годинава наградата за трајни вредности му припадна на Драган Ѓаконовски-Шпато, а во негово име ја прими неговиот син, Мартин кој исто така е музичар и живее во Германија. Годинашното издание на "Дванаесет величествени" беше замислено како спој на музика, мода и убавина. Наградите ги доделуваа манекенки од студиото "Црнокрак", Сашка Павловска, Маја Глигоровска, Викторија Јаначковиќ и други, кои одржаа и две куси модни ревии на кои ги презентираа моделите на бутикот "Монди" од Куманово. На манифестацијата настапија Биба Додева, Маја Вукичевиќ, Калиопи, Тамара и белградската група "187", Мартин Вучиќ, Драган Мијалковски, кој отпеа композиција на Шпато, и Тоше и Есма, кои ја исполнија нумерата "Магија", која го означи крајот на "Дванаесет величествени", на која се прогласуваа најдобрите во поп- и рок-музиката за 2002 година. Освен наградените, поголемиот дел од номинираните учесници не беа присутни на манифестацијата. И овој пат Владо Јаневски не се појави на сцената да си ги прими трите награди. За номинациите и победниците на манифестацијата "Дванаесет величествени" одлучуваа 20 новинари од печатените и од електронските медиуми. Соња Алексоска Неделковска
